ОРАЛ. ҚазАқпарат - Орал қаласында жалған мемлекеттік тіркеу нөмірін пайдаланған 12 жүргізуші анықталып, жауапқа тартылды, деп хабарлайды ҚазАқпарат тілшісі.
БҚО сотының баспасөз қызметінен түскен мәліметке қарағанда, Орал қаласы мамандандырылған әкімшілік соты олардың әрқайсысына 48100 теңге көлемінде айыппұл салды.
Күні бүгінге дейін олардың сегізі айыппұлды өз еркімен төлеген. Қалғандарынан мәжбүрлі түрде өндіріледі.
Айта кетейік, ҚР жол жүру ережесіне сәйкес мемлекеттік тіркеу нөмірі жоқ немесе тіркеу құжаттарына сай келмеген көлік құралын басқаруға тыйым салынады. ҚР Әкімшілік құқықбұзушылық кодексі 590-бабы 4-бөлігіне сәйкес жалған мемлекеттік тіркеу нөмірін таққан жүргізушіге 20 АЕК көлемінде айыппұл салынады немесе ол бір жыл мерзімге көлік құралын басқару құқығынан айырылады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).