ОРАЛ. ҚазАқпарат – Оралда 17 жастағы қыз тыйым салынған кітаптарды сатқан, деп хабарлайды ҚазАқпарат тілшісі.
БҚО Полиция департаментінің баспасөз қызметінен мәлім еткеніндей, бұл дерек әлеуметтік желіге мониторинг жасау кезінде белгілі болды.
Департаменттің экстремизмге қарсы іс-қимыл басқармасының қызметкерлері облыстық Дін істері жөніндегі басқармамен бірлесе отырып, Орал қаласының кәмелетке толмаған тұрғынынан экстремистік мазмұндағы кітаптарды тәркілеген. Жасөспірім қыз діни әдебиетті Инстраграм желісі арқылы таратқан. Кітаптар сараптамаға жіберілді.
Қыздың анасына қатысты ҚР Әкімшілік құқықбұзушылық кодексінің 490-бабы 1-бөлігі 3-тармағына (Қазақстан Республикасының діни қызмет және діни бірлестіктер туралы заңнамасын бұзу) сәйкес әкімшілік хаттама толтырылды. Бұл бап бойынша жеке тұлғаларға – 50, заңды тұлғаларға 200 айлық есептiк көрсеткiш мөлшерінде айыппұл салу қарастырылған.
Жыл басынан бері діни қызмет туралы заңнаманы бұзған 19 адам жауапқа тартылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).