ОРАЛ. ҚазАқпарат - Бүгін Оралда қос автокөлік соқтығысып, үш адам жарақат алды, деп хабарлайды ҚазАқпарат тілшісі.
Облыстық денсаулық сақтау басқармасының баспасөз хатшысы Айнагүл Сақпосынованың айтуынша, оқиға «Динамо» базасы тұсында, Шаған өзенінен өтетін көпір маңында болған.
Жедел жәрдем стансасына шақырту сағат 17.44-те түскен.
Жол апаты салдарынан 1996 жылғы қыз бен 1991 жылғы азамат алдын ала мәлімет бойынша, жабық бас-ми жарақатын алған. 1994 жылғы азаматшаның іш құрылысына зақым келген. Олардың бәрі де облыстық ауруханаға жеткізілді.
Оқиға куәгерлерінің сөзіне қарағанда, сол маңдағы жөндеу орнынан шыққан «Лада Приора» автокөлігі тағы бір көлікке барып соғылған.
Жол апаты салдарынан қалада көлік кептелісі болды. Қазіргі кезде оқиғаның жай-жапсары анықталып жатыр.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).