ОРАЛ. KAZINFORM — Орал қаласындағы тұңғыш Президент алаңында 5 жасар баланы ат теуіп, жарақаттады.
БҚО полиция департаментінің баспасөз қызметінен мәлім еткеніндей, оқиға 27 шілде күні шамамен сағат 19.00-де болды.
«Оқиға салдарынан 2019 жылғы бала облыстық көпбейінді балалар ауруханасының жарақат пунктіне жеткізілді. Жылқы иесіне ҚР Әкімшілік құқықбұзушылық кодексінің 407-2-бабына сәйкес әкімшілік хаттама толтырылып, 10 АЕК көлемінде 36 920 теңге айыппұл салынды», - деп хабарлады ведомстводан.
БҚО денсаулық сақтау басқармасы баспасөз қызметінің нақтылауынша, бала травматология бөлімшесіне жатқызылды. Жағдайы орташа ауыр, қажетті ем алып жатыр.
Бұл – Батыс Қазақстан облысында болып отырған бірінші оқиға емес.
Еске сала кетейік, бұдан бұрын Батыс Қазақстанда 2 жасар баланы жылқы теуіп өлтіргенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).