ОРАЛ. ҚазАқпарат - Орал қаласында бүгін атақты палуан, еркін күрестен КСРО спорт шебері, 1973 жылғы КСРО біріншілігінің қола жүлдегері, бүкілодақтық жазғы ауыл ойындарының бірнеше дүркін жеңімпазы Сайлау Мұқашевтың жүлдесі үшін ересектер, 2004-2006 жылғы және одан кіші жасөспірімдер арасында республикалық ашық турнир басталды, деп хабарлайды ҚазАқпарат тілшісі.
Еркін күрес додасына Ақтөбе, Атырау, Жамбыл, Қызылорда, Маңғыстау облыстары мен Батыс Қазақстан аудандарынан барлығы 13 команда құрамында палуандар 14 салмақ дәрежесі бойынша боз кілемде белдесуде.
Жарыстың ашылу салтанатына әйелдер күресінен Рио олимпиадасының қола жүлдегері Екатерина Ларионова, еркін күрестен жуырда Будапеште өткен әлем біріншілігінің күміс жүлдегері Нұрлан Бекжанов қатысты. Бауыржан Бегайдаров шәкірттері атынан Сайлау Мұқашевтың, сондай-ақ ел мерейін үстем етіп жүрген батысқазақстандық Н.Бекжановтың иығына шапан жауып, құрмет көрсетті.
Дәстүрлі турнир ертең мәреге жетіп, жеңімпаз-жүлдегерлер анықталады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).