ОРАЛ. ҚазАқпарат - Оралда атты полицейлер автокөлікті айдап кеткен ұрыны ұстады, деп хабарлайды «ҚазАқпарат» тілшісі.
Орал қалалық ішкі істер басқармасы жергілікті полиция қызметінің аға инспекторы, полиция майоры Динара Әбділқалықованың айтуынша, оқиға 14 қаңтар күні сағат 12.00 шамасында Зачаган кентінде болған.
Қызмет бабымен жүрген жол-патрульдік полиция батальоны атты взводының қызметкерлері, полиция аға сержанты Хамит Сейтқалиев пен полиция сержанты Нұрбек Рахымжановқа «Балауса» шағынауданынан жасыл түсті ВАЗ-2106 көлігінің айдап әкетілгені жөнінде хабар түскен. Сақшылар сол бойда қылмыс болған маңға бет алып, көп ұзамай автокөлік пен одан шыға қашқан ер адамды байқайды.
Х.Сейтқалиев пен Н.Рахымжанов бұрын бірнеше рет спирттік ішімдік ішкені үшін жауапқа тартылған Орал қаласының 1978 жылғы тұрғынын ұстады.
Қазіргі кезде ҚР ҚК 200-бабына сәйкес қылмыстық іс қозғалып, тергеу амалдары жүргізілуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).