ОРАЛ. ҚазАқпарат - Оралда жуырда ғана құрылған атты полиция взводы ұрыларды ұстады, деп хабарлайды ҚазАқпарат тілшісі.
Орал қалалық ішкі істер басқармасы жергілікті полиция қызметінің аға инспекторы, полиция майоры Динара Әбділқалықованың айтуынша, кеше шамамен сағат 16.00-де жол-патрульдік полиция батальоны атты взвод командирі, полиция аға лейтенанты Мұхит Әбілқайыровтың басшылығымен Зачаган кентіне қарасты шағынаудандарды бақылайтын аға сержанттар Хамит Сейтқалиев, Роман Қызғожин, сондай-ақ Деркөл кенті аумағын шолып жүрген аға сержант Азамат Әділов пен кіші сержант Данияр Ерсайынов қылмыстың ізін суытпай, Деркөлдің еш жерде жұмыс жасамайтын 1990 жылғы екі тұрғынын қолға түсірді. Олар Деркөл мен Зачаган кенті аралығындағы ғимараттан металл газ қазандығын жымқырмақ болған. Оқиға орнынан темір кесетін арнайы құралдар табылған. Келтірілген шығын 300 мың теңгені құрады.
Еске сала кетейік, атты полиция взводы осы айда жұмысқа кіріскен болатын. 25 ат осы қызметке бейім сақшыларға бекітіліп берілген.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).