Оралда әуе спортымен әуестенушілер фестивалі ұйымдастырылды
Оған әуе спорты түрлері бойынша балалар мен жасөспірімдер спорт мектебі, радиомен басқарылатын үлгілермен әуестенушілер клубы, аэроклуб өкілдері қатысып, көрермендер назарына 150-дей үлгі ұсынылды. Жаңбырға қарамастан, радиомен басқарылатын және басқа үлгілер аспанға сәтті ұшырылды.
Әуе спорты түрлері бойынша балалар мен жасөспірімдер спорт мектебінің директоры Александр Черновтың айтуынша, техникалық спорт түрлеріне балаларды ерте бастан баулу қажет. Қазақстанның әлемнің отыз озық елінің қатарына қосылуы үшін Елбасымыз техникалық мамандықтарға баса назар аударып келеді. Соның ішінде әуе спорты түрлері де қалыс қалмауы керек. Оралдық жас әуе үлгісі шеберлері ел біріншіліктерінде жүлдегер, тіпті чемпион атануда. Сондықтан бұрыннан бар дәстүрді үзіп алмай, жеңісті жолды жалғастырудың маңызы зор.
Айта кетейік, биылғы маусымда Оралда әуе үлгісі спортынан әлем кубогының екі кезеңі өтпек. Оған Украина, Ресей, Черногория және Германия елдерінен командалар келмек.