ОРАЛ. ҚазАқпарат - Биыл сәуір айынан бастап Орал қаласында ауыл шаруашылығы тауарларының 31 жәрмеңкесі өткізіліп, 240 млн теңгенің өнімі сатылды, деп хабарлайды «ҚазАқпарат» тілшісі.
Орал қаласы әкімдігінен түскен мәліметке қарағанда, жәрмеңкелерге елуге жуық ауыл шаруашылығы тауарын өндірушілер қатысқан. Оларға және саяжайшыларға сауда орындары тегін берілді. Мұның өзі өнімдер, соның ішінде картоп бағасын тұрақтандыруға септігін тигізді. Мысалы, қазан айының басында картоптың нарықтық бағасы әр келісі 130, дүкендерде 150 теңге болса, жәрмеңкеде 90 теңгеден сатылды. Сөйтіп нарықтық баға 100-110 теңгеге дейін тұрақтандырылды.
Өткен демалыс күндері мәреге жеткен барлық жәрмеңкенің қорытындысы бойынша 852 тонна көкөніс, бау-бақша өнімдері, 83,7 тонна ет, 17 тонна балық және 216 мың дана жұмыртқа сатылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).