ОРАЛ. ҚазАқпарат – Батыс Қазақстан облысында республикалық «Мигрант» жедел алдын алу шарасы барысында бес қылмыскер ұсталды, деп хабарлайды ҚазАқпарат тілшісі.
БҚО полиция департаментінің ресми өкілі Болатбек Белгібековтің мәлім еткеніндей, 15-19 ақпан аралығында өткізілген аталмыш іс-шара кезінде қолға түскен 5 қылмыскердің біреуі халықаралық іздеуде жүрген болып шықты.
«Оралда ауыр қылмыс жасап, соттан бой тасалаған 35 жастағы өзбекстандық азамат ұсталды. Сондай-ақ облыста заңсыз жүрген 15 шетелдік ел аумағынан шығарылды», деді Б.Белгібеков.
Полицияның жедел топтары облыс аумағында жүрген мыңнан астам шетелдік азаматты тексерді.
Соның нәтижесінде елде жүріп-тұру мерзімін бұзған 119 адам, шетелдіктің келуіне байланысты құжат жасамаған 96 облыс тұрғыны және шетелдік жұмыс күшін заңсыз тартқан 5 жұмыс беруші анықталып, бәрі де әкімшілік жауапкершілікке тартылды.
Еске сала кетейік, бұдан бұрын Оралда полиция қызметкерінің 70 мың теңге пара алу кезінде ұсталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).