Оралда автобус пен трактор соқтығысынан жапа шеккен екі адам әлі ауруханада жатыр

АСТАНА. ҚазАқпарат - Трактор жүргізушісі мен автобуста болған жүкті әйел әлі Оралдағы облыстық клиникалық ауруханада жатыр, деп хабарлады «Мой Город».

Денсаулық сақтау басқармасының баспасөз қызметінен хабарлағандай, «Таза қала» ЖШС тракторының жүргізушісі түрлі жарақатпен ауруханаға түскен.

«Қазір жүргізуші мен жолаушы әйел стационарда жатыр. Әйелдің кеуде қуысына зақым келген, жүргізушіге бас сүйек-мидың жабық жарақаты диагнозы қойылды. Олардың жағдайы орташа деңгейде», - деп түсіндірді денсаулық сақтау басқармасының баспасөз қызметінен.

Еске сала кетейік, 1 қазанда №22 жолаушылар автобусы жолды тазартып жатқан тракторға соғылды. Жол-көлік апаты салдарынан алты адам жапа шекті.