Оралда автобус жаяу жүргіншіні қағып кетті
11:52, 13 Маусым 2018
ОРАЛ. ҚазАқпарат - Оралда №5 бағытпен жүретін автобус адамды қағып кетті, деп хабарлайды ҚазАқпарат тілшісі.
Облыстық денсаулық сақтау басқармасының баспасөз қызметінен түскен мәліметке қарағанда, оқиға бүгін сағат 08.58-дер шамасында Достық даңғылы бойында, Карев аялдамасы маңында болған.
Бастапқы мәлімет бойынша 2001 жылғы бозбала (жаяу жүргінші) жабық бас-ми жарақатын алып, миы шайқалған, сол жақ маңдайы көгерген.
Оған қоса автобустағы екі жолаушы зардап шеккен. Алдын ала дерекке қарағанда, 1994 жылғы екі қыз жабық бас-ми жарақатын алып, миы шайқалған, біреуінің тізесі де көгерген.
Қазіргі кезде оқиғаның жай-жапсары анықталып жатыр.