ОРАЛ. ҚазАқпарат - Кеше түсте «КамАЗ» жүк көлігі «Орбита» дүкені маңындағы аялдамада адамдарды түсіріп жатқан №4 бағытта қатынайтын автобусты артынан келіп, түйген, деп хабарлайды «ҚазАқпарат» тілшісі.
Облыстық ІІД жергілікті полиция қызметінің басшысы, полиция полковнигі Манарбек Ғабдуллиннің айтуынша, бұл жерде кінәлі - «КамАЗ» автокөлігінің жүргізушісі. Дегенмен адамдар аса көп зардап шекпеген. Сондықтан бұл жол-көлік оқиғасы бойынша жүргізуші әкімшілік жауапкершілікке тартылатын болады.
БҚО денсаулық сақтау басқармасы басшысының орынбасары Нұрданат Беркінғалидың айтуынша, барлығы 7 адам медициналық көмекке жүгінген, олардың біреуі - бала. Облыстық клиникалық ауруханада қаралғаннан кейін бәрі де амбулаторлық ем қабылдау үшін үйлеріне жіберілген.
Еске сала кетейік, 24 тамыз күні Оралда №7 автобус №5 бағытта жүретін автобустың артынан түйген болатын. Бұдан зардап шеккендердің қатары қазіргі таңда 75-ке жетіп отыр. Күні бүгін қалалық көпбейінді ауруханада біреуі, облыстық клиникалық ауруханада тағы біреуі емделуде, қалғандары үйлеріне шығарылған.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).