ОРАЛ. ҚазАқпарат - Оралда автобуста көз жұмған 80 жастағы зейнеткердің өліміне қатысты қылмыстық іс қозғалды, деп хабарлайды ҚазАқпарат тілшісі.
БҚО ішкі істер департаментінің баспасөз қызметінен түскен мәліметке қарағанда, 6 маусым күні Мәскеу мен Сырым Датұлы көшелерінің қиылысында №46 бағытпен жүретін автобуста 1938 жылғы зейнеткер әйел жедел жәрдем келгенге дейін қайтыс болды.
Жүргізушінің сөзіне қарағанда, дене жарақаттарымен, ес-түссіз күйде жатқан әйелді «Черемушки» саяжай қоғамы аялдамасынан отырғызып алған.
Сол күні аталған дерек бойынша Орал қалалық ішкі істер басқармасы ҚР ҚК 99-бабы 1-бөлігіне сәйкес қылмыстық іс қозғалып, сот-медициналық сараптама тағайындалды.
Сараптама қорытындысын ескере отырып, аталған қылмыстық құқықбұзушылық ҚР ҚК 345-бабы 3-бөлігіне (абайсызда кісі өліміне соқтырған жол ережесін бұзу) қайта дәрежеленді.
Еске сала кетейік, бұдан бұрын автобуста зейнеткер әйелдің көз жұмғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).