ОРАЛ. ҚазАқпарат – Оралда автокөлік екі кісіні қағып кетіп, оның біреуі қаза тапты, деп хабарлайды ҚазАқпарат тілшісі.
БҚО полиция департаментінің баспасөз қызметінен түскен мәліметке қарағанда, оқиға бүгін түнде Шолохов көшесі бойында орын алған.
19 жастағы жүргізуші «Ауди» көлігімен өтуге болмайтын жерде кетіп бара жатқан екі адамды қағып кеткен.
Қазіргі кезде аталған оқиға бойынша ҚР ҚК 345-бабы 3-бөлігіне сәйкес қылмыстық іс қозғалып, тергеу амалдары жүргізілуде.
Облыстық денсаулық сақтау басқармасының баспасөз хатшысы Айнагүл Сақпосынованың нақтылауынша, Шолохов пен Циолковский көшелері қиылысында болған жол-көлік оқиғасына жедел жәрдем сағат 03.20-да шақырылып, екі бригада алты минуттан кейін жеткен.
1990 жылғы ер адам жедел жәрдем келгенге дейін көз жұмды. Жасы 20-лардағы жігіт ашық бас-ми жарақатын алып, есінен танған күйінде облыстық көпбейінді ауруханаға жеткізілді.
«Қазір ол жансақтау бөлімінде жатыр, жағдайы ауыр», - деді ҚазАқпарат тілшісіне А.Сақпосынова.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).