ОРАЛ. ҚазАқпарат – Оралда автокөлік қағып кеткен қария жансақтау бөлімінде жатыр, деп хабарлайды ҚазАқпарат тілшісі.
БҚО полиция департаментінің баспасөз қызметінен мәлім еткеніндей, оқиға 8 қыркүйек күні Сарайшық пен Х.Чурин қиылысында болды.
«Шамамен сағат 16.05-те 20 жасар жүргізуші «ВАЗ-2108» автокөлігімен жаяу жүргінші өткелімен өтіп бара жатқан ер адамды қағып кеткен. Қазіргі кезде сотқа дейінгі тергеу амалдары жүргізілуде», деп хабарлады ведомсводан.
БҚО денсаулық сақтау басқармасы баспасөз қызметінің нақтылауынша, сағат 16.07-де жедел жәрдем шақырылып, 76 жастағы қария облыстық көпбейінді ауруханаға жеткізілді.
Жағдайы өте ауыр, жансақтау бөлімінде жасанды тыныс алу аппаратына қосылған.
Еске сала кетейік, бұдан бұрын БҚО-да шаруа қожалығының басшысы адамдарды құлдықта ұстағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).