ОРАЛ. ҚазАқпарат – Оралда автокөлік өртеніп, күйік шалған ер адам ауруханаға жеткізілді, деп хабарлайды ҚазАқпарат.
БҚО ТЖ департаментінің баспасөз қызметі мәлім еткеніндей, оқиға 19 желтоқсан күні таңмен қалаға қарасты Круглоозерный кентінде болды.
Сағат 05.48-де Первомай мен Строитель көшелерінің қиылысында автокөліктің жанып жатқаны жөнінде хабар түскен.
ВАЗ-21010 автокөлігінің мотор бөлігі мен ішкі панельдері өртенген. Автокөлік иесі, 32 жастағы тұрғын мас күйінде артқы орындықта ұйықтап жатқан. Бетінен, арқасынан, сол аяғы мен білегінен 20 пайыз күйік шалған ер адам ауруханаға жатқызылды.
«Тілсіз жау» №7 өрт сөндіру бөлімінің күшімен (5 адам, 1 техника) сағат 06.00-де оқшауланып, 06.15-те толықтай ауыздықталды.
Облыс бойынша 5 желтоқсанға дейін көлікте 81 өрт тіркелген.
Еске сала кетейік, бұдан бұрын Оралда жол бойында автокөлік жанып кеткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).