ОРАЛ. KAZINFORM – Орал қаласында автокөлік өртеніп кетті.
БҚО ТЖ департаменті баспасөз қызметінің хабарлауынша, оқиға 31 желтоқсан күні Зачаган кентінде болған.
- Жәңгір хан көшесі 35/2-мекенжайында «Беркут» автогаз құю станциясы аумағында Kia Rio автокөлігі отқа оранды. Өрт сағат 15.21-де оқшауланып, 15.28-де сөндірілді. Оқиға орнына 12 адам 3 техникамен барды. Зардап шеккен жүргізуші ауруханаға жеткізілді, - деп хабарлады ведомстводан.
БҚО денсаулық сақтау басқармасы баспасөз қызметінің нақтылауынша, денесінің 20 пайызын күйік шалған 1987 жылғы ер адам қалалық көпбейінді аурухананың политравма бөлімшесіне жатқызылды. Жағдайы - орташа дәрежеде ауыр. Қазіргі кезде қажетті емін алып жатыр.
Еске сала кетейік, бұдан бұрын Оралда өрт қауіпсіздігі талаптарын бұзған компанияға айыппұл салынғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).