ОРАЛ. ҚазАқпарат - БҚО қылмыстық істер жөніндегі мамандандырылған ауданаралық соты азаматтық некедегі әйелін өлтірген Марат Жұмағалиевке қатысты сот үкімін шығарды, деп хабарлайды ҚазАқпарат тілшісі.
ҚР ҚК 106-бабы 3-бөлігіне сәйкес (абайсызда жәбірленушінің өліміне соқтырған қасақана ауыр дене жарақатын салу) М.Жұмағалиев айыпты деп танылып, оған тоғыз жылға бас бостандығынан айыру жазасын қауіпсіздігі орта қылмыстық-атқару жүйесінде өтеу белгіленді.
Аталмыш соттан түскен мәліметке қарағанда, қанды оқиға биылғы 13 шілде күні орын алды. Үйіне мас келген сотталушы азаматтық некедегі әйелі Мария Мурзинаны сондай күйде көрген. Соның салдарынан екеуі сөзге келіп, М.Жұмағалиев сегіз жасар қызын көшеге шығарып жіберген. Содан кейін асүйде Мурзинаның бетінен ұрған. Сосын үстелден ағаш оқтауды алып, басынан он рет ұрған. Қанды көргеннен кейін үйінен кетіп қалған. Жабық бас-ми жарақатын алған әйел біраздан соң оқиға орнында көз жұмған.
Сот үкімі заңды күшіне енген жоқ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).