ОРАЛ. ҚазАқпарат - Оралда белгілі дәрігер-гинеколог Александра Ненашева жол апатынан кейін көз жұмды, деп хабарлайды ҚазАқпарат тілшісі.
БҚО полиция департаментінің баспасөз қызметінен түскен мәліметке қарағанда, жол-көлік оқиғасы 15 қаңтар күні М.Мәметова мен К.Меңдәлиев көшелерінің қиылысында орын алды.
Шамамен сағат 12.10-да «Лада Калина» көлігінің жүргізушісі 1955 жылғы жаяу жүргіншіні қағып кеткен. Әйел облыстық ауруханаға жеткізілгенімен, алған жарақаттары салдарынан көз жұмды.
Қазіргі кезде ҚР ҚК 345-бабы 3-бөлігіне сәйкес (абайсызда адам өліміне соқтырған жол ережесін бұзу) сотқа дейінгі тергеу амалдары жүргізілуде.
А.Ненашева Оралдағы медицина мекемелерінде, соңғы кезде облыстық перинаталдық орталығында гинеколог ретінде қызмет етті.
Марқұм бүгін жерленді.
Дәрігерді білетіндер, курстастары оның білікті маман болғандығын айтып, әлеуметтік желіде көңілдерін білдіруде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).