ОРАЛ. ҚазАқпарат - Оралда белгісіз біреу тұрғынды тонап, автокөлігін алып кеткен, деп хабарлайды ҚазАқпарат тілшісі.
БҚО полиция департаментінің ресми өкілі Болатбек Нұрғожиннің мәлім еткеніндей, 1983 жылғы ер адам өзіне қарақшылық шабуыл жасалғаны жөнінде шағым түсірген.
Белгісіз біреу күш қолданып, оның телефонын, ақшасын тартып алған. Сосын оның «SUBARU OUTBACK» автокөлігінің руліне отырып, оқиға орнынан бой тасалаған.
Аталған дерек бойынша ҚР ҚК 191-бабы 2-бөлігіне (кісі тонау) сәйкес қылмыстық іс қозғалды.
Жәбірленуші келтірілген залал мөлшерін 7 млн 850 мың теңге көлемінде бағалады.
«Сол бойда жедел іздестіру іс-шаралары жүргізіліп, 1985 жылғы күдікті анықталып, ұсталды. Ол автокөлікті сатып үлгермеген. Көлік иесіне қайтарылды», деді ҚазАқпарат тілшісіне Б.Нұрғожин.
Еске сала кетейік, бұдан бұрын Оралда дәріханада заңсыз қызмет әшкереленіп, 700 мың теңгенің тауары тәркіленгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).