Оралда «Біз бірдейміз, кемсітуді білмейміз» байқауының жеңімпаздары белгілі болды
БҚО жастар саясаты мәселелері басқармасының қолдауымен «Жас қанат» жастар қоғамдық бірлестігі ұйымдастырған дәстүрлі сайысқа аудандар мен қаладан іріктеліп келген жиырмадан астам үміткер қатысып, бақ сынады.
Байқау қорытындысында «Үздік би ансамблі» аталымы бойынша облыстық есту және сөйлеу қабілеті бұзылған балаларға арналған мектеп-интернатының «Арман» би ансамблі жеңімпаз атанды. Эстрадалық вокалдан облыстық көру қабілеті бұзылған балаларға арналған мектеп-интернатының шәкірті Ерлан Нұрхаев озып шықты. Ісмерліктен ақжайықтық Аңсар Беріков алдына жан салмаса, мәнерлеп оқудан Сырым ауданындағы «Нұршуақ» қоғамдық бірлестігінің мүшесі Ақжан Естаулетова жеңіске жетті. Ишара арқылы ән орындаудан оралдық Мейрамгүл Айтқалиева үздік атанды. Олардың бәріне сыйлықтар мен алғысхаттар табыс етілді.