Оралда дәстүрлі Қадыр оқулары өткізілді

ОРАЛ. 29 наурыз. ҚазАқпарат - Ғ.Құр­ман­ғалиев атындағы облыс­тық филармонияның за­лын­да II облыстық «Қа­дыр оқулары» мәреге жетті.

Ж.Молдағалиев атындағы об­лыстық ғылыми-әмбебап кітапханасы мен қалалық әкімдік, Орал қала­­лық мәдениет және тілдерді дамы­ту бөлімінің ұйым­дастыруымен өт­кен бай­қауға 10 үміткер қатысты. Бай­қау үш кезеңнен тұрды. Бірінші кезеңде қатысушылар алдын ала мәлімделген тізім бойынша конвертке салынған Қадыр өлеңдерінің атауын суырып, сол бойда жатқа оқыды. Екінші кезеңде Қадыр Мырза Әлінің ақындық ұлағатының әсерінен туындаған, бұрын еш жерде жарияланбаған өз туындыларын оқыды. Ал үшінші кезең бойынша үміткерлерге «Жүректе жарқын бейнеңіз» тақырыбында эссе жазу ұсынылды. Бұл бөлімде бай­қауға қатысушының шешендігі, ой жүйелілігі, тіл шұрайлылығы сынға түсті.

Байқау нәтижесінде белгілі әдебиетші-ғалым, филоло­гия ғылымдарының кандидаты, М.Өте­місов атындағы БҚМУ-дың профессоры Серікқали Шара­­ба­сов төрағалық еткен қазылар ал­­қа­сы­ның шешімімен Батыс Қа­зақстан гуманитарлық ака­де­мия­сы­ның қа­зақ тілі мен әдебие­ті маман­дығының 1-курс студенті Әнуарбек Мүтиғоллаев бас жүлдеге лайық деп танылды. Жеңімпазға қоса, жүлдегерлер де диплом және бағалы сыйлықтармен марапатталды.