ОРАЛ. 11 қыркүйек. ҚазАқпарат - Оралда дәстүрлі Сорочин жәрмеңкесі бұл жолы қала орталығында, М.Ықсанов атындағы көше бойында ұйымдастырылды.
Күзгі жиын-теріннен соң бүкіл халықтың қуанышына айналатын жәрмеңкелер Украинада ХІХ ғасырдан кеңінен тараған.
Облыс әкімінің орынбасары Серік Сүлеймен жәрмеңкеге келгендерді құттықтап, оның әр шаңыраққа ырыс-береке әкелуіне тілектестігін білдірді.
Биыл Оралда Сорочин жәрмеңкесі бесінші рет тойланып отыр. Оған Зеленов, Теректі, Бөрлі, Тасқала, Шыңғырлау аудандарынан украин ұлттық-мәдени орталықтарының өкілдері келіп, ұлттық дәм-тағамдарын ұсынды, концерттерін қойып жатты. Жергілікті ісмерлер қолынан шыққан бұйымдар да келушілерді бей-жай қалдырған жоқ.
Украин этномәдени орталығының төрағасы Виктор Тарасенконың сөзіне қарағанда, алдағы уақытта жәрмеңке аясын кеңейтіп, Ресей мен Украинада, Ақтөбе секілді көршілес облыстарда тұрып жатқан украин ұлтының өкілдерін шақыру ойластырылуда.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).