12:05, 26 Мамыр 2017

Оралда деструктивті діни ағымды жақтаушы тұрғынға айыппұл салынды

ОРАЛ. ҚазАқпарат - Өткен жылдың желтоқсан айында Орал қаласының деструктивтік діни ағымды жақтаушы тұрғыны ғибадат орындарының бірінде еліміздегі дәстүрлі Әбу-Ханифа мазһабының талаптарымен келіспейтінін білдіріп, имамға бағынбай, діни рәсімнің атқарылуына кедергі келтірген, деп хабарлайды «ҚазАқпарат» тілшісі.

БҚО ішкі істер департаментінің баспасөз қызметінен түскен мәліметке қарағанда, аталған тұрғынға қатысты ҚР Әкімшілік құқықбұзушылық кодексі 490-бабы 2-бөліміне сәйкес әкімшілік материал хатталып, ол сотқа жіберілді.

Орал қалалық мамандандырылған әкімшілік сотының деструктивтік діни ағымды жақтаушы тұрғын кінәлі деп танылып, оған 35 АЕК көлемінде 79415 теңге айыппұл салынды.

Батыс Қазақстан облысы Дін

Ғайсағали Сейтақ

1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).