ОРАЛ. ҚазАқпарат - Батыс Қазақстан облыстық қазақ драма театрында кеше осы театрдың бас режиссері Мұқанғали Томановтың «Жәннат» атты драмасының премьерасы болды.
М.Томановтың өзі сахналаған туынды тақырыбы - қазіргі таңда көкейкесті мәселеге айналып отырған діндегі адасушылық. Теріс ағымдарға ілесіп, отбасылық және ұлттық құндылықтарды тәрк етіп, қоғамнан аулақтағандардың тірлігі көз алдыңа келеді. Адасқандардың алды шетелдердегі қақтығыстарға аттанып, бірқатары сотталып та жатыр. Міне, театр әртістері осы шынайы өмірді суреттеп, мұндай жат қылықтардан елді, әсіресе, жастарды сақтандырады. Басты роль Сүйенішті Асылжан Жакин сомдаса, театрдың белді актрисаларының бірі, жуырда ғана қырықтың белесіне көтерілген Нұрлыгүл Жұбатова Ана бейнесінде шықты. Имамды Думан Омаров бейнеледі.
Айта кетейік, «Жәннат» драмасы БҚО дін істері басқармасының бастамасымен қойылды. Авторға теологтар Мақсат Раманқұлов пен Нұржан Стамбакиев кеңес берген.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).