ОРАЛ. ҚазАқпарат - Бүгін Оралда ер адам автобусты жөндеу кезінде оның астында қалып, көз жұмды, деп хабарлайды «ҚазАқпарат» тілшісі.
Куәгерлердің сөзіне қарағанда, қайғылы оқиға Жәңгір хан көшесі бойында, Шаған өзенінен өтетін көпір мен Зачаган кенті аралығында болған. №2 бағытта жүретін автобус сынып қалып, оны жөндеуге маман шақырылған. Ер адам автобустың астында жатып, жөндеп жатқан кезде домкрат тайып кеткен.
Қазіргі кезде оқыс оқиғаның мән-жайы анықталу үстінде.
Еске сала кетейік, кеше кешкісін Оралда «Киа» автокөлігі «Саяхат» аялдамасында №43 бағытта жүретін автобуспен түйісіп, төрт адамның жарақат алғандығын жазған болатынбыз. Мұнда «Киа» көлігінің жүргізушісі рульге ие бола алмай, қарсы бетке шығып кетіп, автобуспен соқтығысуға жол берген.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).