ОРАЛ. KAZINFORM – Батыс Қазақстан облысы полиция департаментінің есірткі қылмысына қарсы іс-қимыл басқармасының қызметкерлері Орал қаласында жедел іздестіру іс-шаралары барысында 1974 жылы туған ер адамды ұстады.
БҚО полиция департаментінің баспасөз қызметінен мәлім еткеніндей, оның тұрғылықты жерін тінту барысында өзіне тән иісі бар жасыл түсті өсімдік тектес зат салынған зип-пакеттер табылып, тәркіленді.
– Қазіргі кезде аталған дерек бойынша қылмыстық іс қозғалып, тергеу амалдары жүргізіліп жатыр. Қазақстан Республикасы Қылмыстық іс жүргізу кодексінің 201-бабына сәйкес өзге ақпарат жария етілмейді, - деп хабарлады ведомстводан.
Департамент мәліметіне қарағанда, қолданыстағы заңнамаға сәйкес есірткі құралдарын, психотроптық заттарды және олардың аналогтарын заңсыз сатып алу, сақтау, тасымалдау, өткізу мақсатында жөнелту не өткізу мүлкі тәркілене отырып, 5 жылдан 8 жылға дейінгі мерзімге бас бостандығынан айырумен жазаланады.
Еске сала кетейік, бұдан бұрын Алматыда ірі көлемде алаяқтық жасаған күдіктінің Оралда ұсталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).