ОРАЛ. KAZINFORM — Орал қаласында бас жоспарды түзету жобасына қатысты шыққан шуға орай тиісті шара қолданылды.
Kazinform бұдан бұрын жазғанындай, қоғамдық тыңдалым кезінде әкімдік сайтында жүктелген жобалық материалдарда Орал емес, көбінесе Қарағанды мен Семей қалаларының деректері жарияланып кеткені айтылған еді.
Қала тұрғыны Данил Макатуханың мәлім еткеніндей, барлық есеп Оралға еш қатысы жоқ деректер негізінде жасалған. Сондай-ақ аталған бас жоспар жобасы үшін жобалаушы мекемеге 250 млн теңге төленгені белгілі болды.
Орал қаласы әкімдігінен алынған мәліметке қарағанда, сол кездегі жауапты архитектура маманы қазіргі уақытта жұмыс істемейді. Сондықтан оған тәртіптік шара қолдану мүмкін болмады.
— Сөгіс Орал қаласы әкімінің орынбасары Азамат Халеловке берілді, — деп хабарлады әкімдіктің баспасөз қызметінен.
Еске сала кетейік, бұдан бұрын Оралда бас жоспарды түзету жобасына қатысты шу шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).