ОРАЛ. ҚазАқпарат – Орал қаласында «КамАЗ» жүк көлігі автобуспен соқтығысты, деп хабарлайды ҚазАқпарат тілшісі.
БҚО полиция департаментінің баспасөз қызметінен мәлім еткендей, оқиға бүгін шамамен сағат 15.00-де Сырым Датұлы көшесінде болған.
«КамАЗ» жүк көлігінің 1987 жылғы жүргізушісі «Дина» гипермаркеті маңында жол қозғалысы қауіпсіздігін қамтамасыз етпей, №39 бағытта жүретін автобуспен түйіскен.
Автобуста жүргізушіге қоса 8 адам болған.
Екі жүргізуші де медициналық куәландырудан өтті, қорытындысы кейін анықталады.
«Зардап шеккендер медициналық көмек көрсетілгеннен кейін үйлеріне жіберілді. Жол-көлік оқиғасын жасаған «КамАЗ» жүк көлігінің жүргізушісіне қатысты ҚР Әкімшілік құқықбұзушылық кодексі 610-бабына сәйкес әкімшілік хаттама толтырылды», - деп хабарлады ведомстводан.
Қазіргі кезде оқиғаның жай-жапсары анықталып жатыр.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).