Оралда қарияларға құрмет көрсетілді
Орал қалалық жұмыспен қамту және әлеуметтік бағдарламалар бөлімі басшысының орынбасары Сәуле Шоланбаеваның атап өткеніндей, өңірде 1 қазанда басталған дәстүрлі «Мейірбандық күндері» қайырымдылық айлығы аясында жоспарға сәйкес ай бойы іс-шаралар ұйымдастырылып, аз қамтылған, жалғызілікті, мүгедек жандарға көмек көрсетілетін болады. Бұл жолы негізінен сонау ел басына күн туған шақта Отанымызды қорғаған майдангерлер мен тылда күн-түн демей еңбек еткен ардагерлерге арналып, дастархан жайылды. Осыған орай демеушілік көрсеткен «Әсем» мейрамханасының меңгерушісі Зайра Хамитоваға алғыс айтылды. Шараны аталмыш бөлімнің зейнеткерлер мен мүгедектерге әлеуметтік қызмет көрсету аумақтық орталығы (директоры Арман Дәулетов) ұйымдастырды.
-Осы шараны ұйымдастырушыларға шын жүректен алғысымды айтамын. Шыны керек, жасымыз ұлғайған соң, басымыз қосыла бермейді. Тәтті тағам онысыз да бар ғой, өзіміз шамалас замандастарымызбен әңгіме дүкен құрып, бір жасап қалдық. Өнерпаздарымыздың ән-күйіне де ризамыз, - деді Оралға қарасты Зашаған кентінде тұратын ардагер-ұстаз Социал Пұсырман.
Шара барысында Жастар мәдениет үйінің әншілері мен «Ақжелкен» балалар аула клубының балауса әртістері өз өнерлерін көрсетіп, қариялардың қошеметіне бөленді. Демеушілер атынан майдангерлер мен тыл еңбеккерлеріне тарту-таралғылар табыс етілді.