ОРАЛ. ҚазАқпарат - Оралда үйінде жасөспірімге оқ атылған бұрынғы әкімге қатысты үкім шықты, деп хабарлайды ҚазАқпарат тілшісі.
Орал қалалық сотынан түскен мәліметке қарағанда, Қайырғали Имашев ҚР ҚК 289-бабына (атыс қаруын ұқыпсыз сақтау) сәйкес айыпты деп танылып, оған 120 АЕК көлемінде 288,6 мың теңге айыппұл салынды.
Қ.Имашев сақтық жасамай, қару мен оқ-дәрі сақталған сейфтің кілтін қолжетімді жерге қалдырып, өзінің жеке шаруаларымен кетіп қалған.
Сол күні Қ.Имашевтің ұлына қонаққа келген кәмелетке толмаған Ерсайын А. қолына қаруды бірінші рет ұстағандықтан, оны қалай қолданатындығын білмегендіктен, абайсызда шүріппесін басып қалған. Оқ тағы бір жасөспірім Е.Ерғариннің мойнына тиген. Соның салдарынан ауыр жарақат алып, жұлынына зақым келген Е.Ерғарин облыстық көпбейінді балалар ауруханасына жеткізіліп, жансақтау бөліміне жатқызылған.
Еске сала кетейік, бұдан бұрын үйінде жасөспірімге оқ атылған Бөрлі ауданының бұрынғы әкімі Қ.Имашевқа қатысты істің қаралып жатқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).