ОРАЛ. KAZINFORM – Орал қаласында С.Тюленин көшесі мен Әбілқайыр хан даңғылы қиылысында орналасқан диаметрі 600 мм (темірбетон) кәріз коллекторында болған апатқа байланысты қалпына келтіру жұмыстары жүргізіліп жатыр.
«Батыс су арнасы» ЖШС-ның баспасөз қызметінен мәлім еткеніндей, осыған орай Әбілқайыр хан даңғылының У.Громова көшесінен бастап Желтоқсан көшесіне дейінгі аралығы уақытша жабылды.
– Барлық көлік түрінің қозғалысына шектеу қойылды. Қазіргі уақытта апатты жою мақсатында пайдаланушы ұйым дайындық және ұйымдастыру жұмыстарын жүргізіп жатыр, - деп хабарлады ведомстводан.
Мекеменің хабарлауынша, сонымен қатар Солтүстік-шығыс-2 шағынауданында диаметрі 100 мм ысырманы ауыстыру жұмыстары жүргізілуде. Соған байланысты аталмыш шағынауданда 27, 9, 17, 17/1-үйде, № 26 «Тұлпар» және № 20 «Балбөбек» балабақшасына салқын су беру тоқтатылды. Мұндағы жұмыс шамамен бүгін сағат 16.00-ге дейін жалғасады.
Еске сала кетейік, бұдан бұрын Орал қаласындағы сорғы станциясында апатты жағдай болғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).