ОРАЛ. ҚазАқпарат - Бүгін Ұлыстың ұлы күні - Наурыз мерекесіне орай Қадыр Мырза Әли атындағы мәдениет және өнер орталығының амфитеатрында қазақ күресінен «Орал барысы» жарысы мәреге жетті, деп хабарлайды «ҚазАқпарат» ХАА тілшісі.
Сайысты ұйымдастырған әрі оның бас төрешісі Артур Шерғалиевтің айтуынша, дәстүрлі жарысқа Орал қаласынан барлығы 12 палуан қатысып, бақ сынады. Қорытындысында Бақтияр Ибрагимов жеңімпаз атанып, 50 мың теңге көлеміндегі ақшалай сыйлыққа ие болды. Екінші орынға көтерілген Сұңғат Махамбетовке домбыра, үшінші жүлдені еншілеген Дамир Рамазановқа қамшы табыс етілді.
Енді Б.Ибрагимов пен С.Махамбетов алдағы сәуір айында өтетін «БҚО барысына» қатысып, «Қазақстан барысы» турнирінің жолдамасын иелену үшін күш салады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).