ОРАЛ. ҚазАқпарат - Орал қаласында «Хазар» кемпингінде өрт болды, деп хабарлайды ҚазАқпарат тілшісі.
БҚО ТЖ департаменті мемлекеттік өрт бақылау басқармасының аға инженері Сағдат Әнестің мәлім еткеніндей, оқиға 9 қаңтар күні Жәңгір хан көшесі 91-мекенжайында болды.
Сағат 03.14-те кемпинг аумағында орын тепкен екі қабатты шиномонтаж ғимаратында жеке заттар, пластикалық терезе рамалары, тұрмыстық техникалар жанып кетті.
Өрт аумағы 44 шаршы метрді қамтыды.
Өрт сөндірушілердің ұтымды іс-қимылы нәтижесінде оқиға орнынан 4 оттегі, 4 пропан және фреоны бар 14 баллон (хладагент) шығарылды.
«Тілсіз жау» департамент күшімен (7 адам, 3 техника) сағат 04.38-де ауыздықталды.
Қазіргі кезде өрттің шығу себебі, келген шығын анықталу үстінде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).