ОРАЛ. KAZINFORM — «Заң мен тәртіп» қағидатын іске асыру аясында Орал қалалық полиция басқармасы қоғамдық тәртіптің жай-күйіне талдау жүргізіп, құқық бұзушылықтар жиі тіркелетін ойын-сауық орындарын анықтады.
БҚО полиция департаментінің баспасөз қызметінен мәлім еткеніндей, солардың бірі «Жеңіс» шағынауданында орналасқан, таңғы сағат 06.00-ге дейін жұмыс істейтін SKY кафесі екендігі белгілі болды.
Жыл басынан бері аталған кафеге түнгі және таңғы уақытта полицияның 102 қызметіне 70-ке жуық шақырту түскен. Сонымен қатар дәмханада 10 қылмыс, бірнеше әкімшілік құқық бұзушылық тіркелген.
Осы деректерді ескере отырып, Орал қалалық полиция басқармасы тиісті органдарға бірлескен тексеру жүргізу туралы ұсыныс жолдады.
- Нәтижесінде қалалық төтенше жағдайлар және санитариялық-эпидемиологиялық бақылау басқармаларының өкілдерімен бірге тексеру жүргізілді. Соның барысында бірқатар заң бұзушылық анықталып, кафенің қызметі тоқтатылды, - деп хабарлады ведомстводан.
Еске сала кетейік, бұдан бұрын БҚО-да «Жария» қоғамдық бірлестігіне қатысты алаяқтық бойынша тергеу жүргізіліп жатқанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).