ОРАЛ. KAZINFORM — Орал қаласында ер адамның қызды ұрып-соғып жатқаны түсірілген бейнежазба әлеуметтік желіде таралды.
Ондағы ақпаратқа қарағанда, оқиға Оралдағы клубтардың бірінде болған. Бейнежазбада ер адамның қызды ұрғаны, содан кейін бетіне ыдысты лақтырғаны көрінеді.
Осыған байланысты Kazinform тілшісі БҚО полиция департаментінің баспасөз қызметіне хабарласқан еді.
Департаменттің баспасөз қызметінен түскен мәліметке қарағанда, аталған дерек бойынша ҚР ҚК 109-бабына (ұрып-соғу) сәйкес қылмыстық іс қозғалған.
— Бейнежазбада көрсетілген ер адам ұсталып, полиция бөліміне жеткізілді. Қазіргі уақытта тергеу жұмыстары жалғасуда. Тергеу барысы Батыс Қазақстан облысы полиция департаменті басшылығының бақылауында. ҚР Қылмыстық-процестік кодексінің 201-бабына сәйкес өзге ақпарат жария етуге жатпайды, — делінген ресми жауапта.
Еске сала кетейік, бұдан бұрын Оралда тойдағы жанжалға байланысты қылмыстық іс қозғалғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).