ОРАЛ. ҚазАқпарат – Облыстық жұқпалы аурулар ауруханасында емделіп жатқан науқастар үйге қайтаруларын талап еткен, деп хабарлайды ҚазАқпарат тілшісі.
БҚО полиция департаментінің баспасөз қызметінен түскен мәліметке қарағанда, оқиға 1 мамыр күні шамамен сағат 14.15-те болды.
Отыздай адам емдеу мекемесінің ауласына шығып, өз беттерімен кетіп қалғысы келген. Бәріне COVID-19 диагнозы қойылғанына қарамастан, өздерінде ауру белгілері байқалмайтынын мәлімдеген. Медицина қызметкерлерінің талабына бағынбағаннан кейін оқиға орнына полиция қызметкерлері жедел жетті.
Түсінік жұмыстары жүргізілгеннен соң сағат 14.45-те барлық емделушілер палаталарына тарады. Қоғамдық тәртіп бұзылған жоқ.
БҚО әкімінің баспасөз қызметі жағдайдың қалыпқа келгенін, көп ұзамай облыстық денсаулық сақтау басқармасы да мәлімет беретінін жеткізді.
Еске сала кетейік, бұдан бұрын БҚО-да коронавирус жұқтырған 6 адамның бәрі де медицина қызметкері екендігін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).