ОРАЛ. ҚазАқпарат - Оралда қоспәтерлі тұрғын үй өртеніп кетті, деп хабарлайды ҚазАқпарат тілшісі.
БҚО ТЖ департаментінің баспасөз қызметінен түскен мәліметке қарағанда, оқиға кеше сағат 13.51-де Зачаган кенті «Сарытау» шағынауданында орын алды. Күлтегін көшесі, 42 мекенжайында орналасқан қоспәтерлі үйдің төбесі мен жақтаулары отқа оранды.
Өрт аумағы 240 шаршы метрді қамтыды. Үш бірдей өрт сөндіру бөлімінен 12 адам, 3 техника «тілсіз жауды» ауыздықтауға жұмылдырылды. Өрт орнынан орта дәрежелі газбен уланған деген диагноз қойылған 2009 жылғы бала ауруханаға жатқызылды.
Тұрғындардың сөзіне қарағанда, өрт салдарынан қос бірдей отбасы далада қалған. Оның бірінің бес кішкентай баласы бар.
Еске сала кетейік, бұдан бұрын Оралда қос бірдей жол-көлік оқиғасынан екі адам зардап шеккен болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).