ОРАЛ. ҚазАқпарат - Оралда бүгін жедел құтқару жасағының қызметкерлері 2005 жылғы баланы суға кетуден аман алып қалды, деп хабарлайды ҚазАқпарат тілшісі.
БҚО ТЖ департаменті жедел құтқару жасағының бас құтқарушысы Аягөз Қожанбаеваның айтуынша, қалалық мәдениет және демалыс саябағындағы құтқару бекетінде кезекшілікте жүрген Павел Федоров пен Азамат Жәрдемов Шаған өзеніне батып бара жатқан баланы байқап қалды.
Жағалаудан жырақтап кеткен балаға Азамат Жәрдемов жедел жүзіп барып, оны судан алып шықты. Құтқарушылар қатты қорқып қалған балаға қажетті көмек көрсетті. Баласының алысқа ұзап кеткенін көрмей, салғырттық танытқан анасына да суға түсу кезінде қауіпсіздік сақтау керектігі ескертілді.
Еске сала кетейік, бұл - Оралдағы мұндай бірінші оқиға емес. Бұдан бұрын құтқарушылардың он жасар баланы аман алып қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).