ОРАЛ. ҚазАқпарат - Орал қаласында өңірге танымал ардагер, Қазақстанның еңбек сіңірген мәдениет қызметкері Инна Гудошникованың 80 жасқа толуына орай құрмет көрсетілді.
Алдымен ардагерді облыс әкімінің орынбасары Бақтияр Мәкен қабылдап, өңірдегі мәдениет саласының дамуы, өнер қайраткерлерінің жай-күйі туралы әңгімелесті.
Содан кейін Ғ.Құрманғалиев атындағы облыстық филармонияның концерт залында И.Гудошникованың «Менің жылдарым - менің байлығым» атты мерейтойлық кеші өтті. Онда облыс әртістері өз өнерлерін көрсетіп, соның ішінде мерейтой иесінің жары, ақын Владислав Ирхиннің туындыларын орындады.
Айта кетейік, 1935 жылғы 16 қаңтарда Орал қаласында дүниеге келген Инна Гудошникова қырық жылдан астам уақыт бойы мәдениет саласында қызмет етті. Соның ішінде 1971-1997 жылдары облыстық мәдениет басқармасы басшысының орынбасары ретінде саланың өркендеп, дамуына өз үлесін қосты. Ол «Ерен еңбегі үшін» және басқа медальдармен, құрмет грамоталарымен марапатталған.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).