ОРАЛ. ҚазАқпарат - Бүгін Батыс Қазақстан облысының әкімі «Пош Руно» ЖШС салып жатқан, ірі қара және ұсақ мал терісін өңдейтін зауыт құрылысымен танысты, деп хабарлайды «ҚазАқпарат» ХАА тілшісі.
Қазіргі кезде едәуір жұмысы бітіп қалған зауытта испандық және итальяндық құрал-жабдықтар орнатылуда. Күні бүгін құрылысқа 40 жергілікті тұрғын тартылса, жоба іске қосылған кезде 84 жұмыс орны ашылмақ. Зауыт толық қуатына көшкен уақытта жылына 182 мың ірі қара, 624 мың ұсақ малдың терісін өңдейтін болады.
«Мал шаруашылығы жақсы дамыған Батыс Қазақстан үшін бұл - бірегей жоба. Енді шаруалар мен ауыл тұрғындарына тері өткізіп, қосымша табыс табатын орын да пайдалануға берілмек», деді Алтай Көлгінов.
Айта кетейік, өңірде жүн, тері өңдейтін кәсіпорын болмағандықтан, тұрғындар оны көбінесе далаға тастап келген еді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).