ОРАЛ. ҚазАқпарат - Орал қаласында орта мектеп мұғалімі туберкулездің ашық түрімен ауыратыны анықталды, деп хабарлайды ҚазАқпарат тілшісі.
Облыстық білім басқармасынан түскен мәліметке сүйенсек, педагог жалпы білім беретін №26 мектепте жұмыс істейді.
Аталмыш мектеп мұғаліміне 2 қараша күні денсаулығына байланысты еңбекке жарамсыздық парағы ашылып, кейін оның ашық түрдегі туберкулезбен сырқаттанғаны белгілі болған.
Ұстаз биылғы шілде айында флюорографиядан өткен, медициналық байқаудың қорытындысымен оған жұмысқа рұқсат берілген. Соңғы үш жылда денсаулығына байланысты жұмыстан қалмаған. Қазіргі таңда ол ауруханада ем қабылдауда.
«Бүгінде ата-аналар мен оқушылар арасында білім ордасының, Орал қалалық қоғамдық денсаулық сақтау басқармасы мен денсаулық сақтау органдарының қызметкерлері тиісті жұмыстар жүргізуде», - деді облыстық білім басқармасы басшысының орынбасары Зәуре Ғұмарова.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).