ОРАЛ. 20 наурыз. ҚазАқпарат - Батыс Қазақстан облыстық қазақ драма театрында 20 наурыз күні Наурыз мерекесіне орай «Мерекелі, берекелі Наурыз той» атты концерт қойылды.
Шара театр фойесінде әзірленген облыстық ұлттық мәдени орталықтары мен облысқа танымал өнер иелерінің «Наурыз - достық, наурыз - құт» деп аталған мерекелік тартуымен басталды. Белгілі ақын, халықаралық «Алаш» сыйлығының иегері Ақұштап Бақтыгереева қадамын енді басқан сәбидің тұсауын кесіп, өміріне ақжолтай тіледі. Ал еңбек ардагері Әмірхан Қарасаев бүлдіршінге арнап өзінің ақ батасын берді. Жиналған қауымға наурызкөжеден дәм ұсынылып, тәттіден шашу шашылды.
Облыс әкімі Нұрлан Ноғаев қатысқан фойедегі театрландырылған көрініс одан әрі концерттік бағдарламаға ұласты.
Наурыз мейрамына арналған мерекелік шаралар 21, 22 наурыз күндері де жалғасады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).