ОРАЛ. ҚазАқпарат - Орал қаласында 3-4 ақпан күндері Қазақстан Республикасы Дзюдо федерациясы өкілдерінің қатысуымен дзюдодан бапкерлер семинары өтіп жатыр.
Оралда осындай дәрежеде алғаш рет ұйымдастырылып отырған семинарда олимпиада ойындарының жүлдегерлері, дзюдодан ҚР ұлттық құрамасының жаттықтырушысы Айдын Смағұлов, Дзюдо федерациясы дамыту жөніндегі директоры Асхат Житкеев, Қазақстанның еңбек сіңірген жаттықтырушысы, Дзюдо федерациясы ғылыми-әдістемелік тобының жетекшісі Михаил Шепетюк батысқазақстандық бапкерлерге дәріс беруде.
Федерация өкілдерінің айтуынша, семинардың басты мақсаты - жалпы еліміз бойынша дзюдо күресінің деңгейін көтеру және жаттығу бағдарламаларын ортақ жүйеге түсіру. Осылайша, дзюдо күресінен еліміздің барлық аймақтарындағы бапкерлердің біліктілігін шыңдауға арналған пилоттық негіздегі жоба Орал қаласынан бастау алып отыр.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).