ОРАЛ. ҚазАқпарат - 5 қыркүйек күні сағат 06.45-те БҚО ТЖ департаменті өрт сөндіру және апаттық-құтқару жұмыстары қызметінің орталық пунктіне Зачаган кенті Южная көшесі 11-мекенжайында уақытша тұрғын үйдің жанып жатқаны жөнінде мәлімет түскен, деп хабарлайды «ҚазАқпарат» тілшісі.
БҚО ТЖ департаменті өрт сөндіру және апаттық-құтқару жұмыстары қызметінің баспасөз қызметінен түскен мәліметке қарағанда, уақытша мекенжайда жиһаз, ішінара еден және жеке заттар отқа оранған.
Өрт орнынан үш адамның мүрдесі табылды. 1994 жылғы азаматша, 2011 жылғы бала және үшінші адам анықталу үстінде.
Өрттің жалпы аумағы 10 шаршы метрді құрады. 07.30-да өрттің беті қайтып, 07.51-де толықтай ауыздықталды. Оны сөндіруге 3 техника, 12 адам жұмылдырылды.
Қазіргі кезде өрттің шығу себебі, келген шығын, кінәлілер анықталуда.
Осы оқиғаға байланысты БҚО ІІД жедел тергеу тобы жұмыс жасауда.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).