ОРАЛ. ҚазАқпарат – Оралда полиция қызметкеріне пара бермек болған тұрғын ұсталды, деп хабарлайды ҚазАқпарат тілшісі.
БҚО полиция департаментінің баспасөз қызметінен түскен мәліметке қарағанда, оқиға 30 қаңтар күні орын алды.
Сағат 14.07-де «Виктория» қонақүйі жанында патрульдік автокөлік ішінде Орал қаласы полиция басқармасы патрульдік полиция батальонының взвод командирі, полиция аға лейтенанты Нұржан Ғумировқа 5 мың теңге пара бермек болған 1979 жылғы тұрғын қолға түсті. Ол ҚР Әкімшілік құқықбұзушылық кодексі 601-бабы 1-бөлігіне сәйкес әкімшілік жауапкершілікке тартылмас үшін мәселені осылайша шешпек болған.
Анықталғанындай, «FORD» автокөлігінің жүргізушісі Сырым Датұлы мен Жамбыл көшелерінің қиылысында жол ережесін бұзып, соған сәйкес 7953 теңге айыппұл төлеу жөнінде хаттама толтырылған.
Аталған дерек бойынша ҚР ҚК 367-бабы 1-бөлігіне (пара беру) сәйкес сотқа дейінгі тергеу амалдары жүргізілуде.
Күдіктіге шақыру бойынша міндетті түрде келу шарасы қолданылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).