ОРАЛ. ҚазАқпарат - «Қазақстан Республикасы Тәуелсіздігінің 25 жылдығына байланысты рақымшылық жасау туралы» ҚР Заңына сәйкес Орал қалалық сотында бас бостандығынан айыру орнында жазасын өтеп жатқан адамға рақымшылық жасау туралы бірінші іс қаралды, деп хабарлайды «ҚазАқпарат» ХАА тілшісі.
БҚО бойынша қылмыстық-атқару жүйесі департаментінің бас маманы міндетін атқарушы, әділет майоры Тимур Дүйсәлиевтің айтуынша, сот ҚР ҚК 200-бабы 1-бөліміне сәйкес 1 жыл 6 ай 28 күнге сотталып, Орал қаласындағы РУ-170/2 мекемесінде жазасын өтеп жатқан Андрей Портновты босату туралы өтінішті қанағаттандырды.
Сондай-ақ сот қаулысымен ҚР ҚК 378-бабы 1-бөлігі, 380-бабы 1-бөлігі, 58-бабы 2-бөлігі, 60-бабына сәйкес бас бостандығы шектелген А.Мельников те жазадан босатылды.
Сот қаулысы заңды күшіне енген жоқ.
Еске сала кетейік, аталмыш заңға сәйкес облыста бас бостандығынан айыру орындарында жазасын өтеп жатқан 150 және пробация қызметі есебінде тұрған 610 адамға кешірім жасау көзделуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).