ОРАЛ. ҚазАқпарат - Бүгін Орал қаласындағы жаңа алаңда «Рухани жаңғыру» бағдарламасы аясында «Дәстүр» атты мәдени-ағарту, көпшілік шаралары өтті, деп хабарлайды «ҚазАқпарат» тілшісі.
Қазақстан халқы БҚО ассамблеясының «Этностар күні» жобасына сәйкес қазақ халқының салт-дәстүрлеріне арналған шараға барлық аудандар, жоғары және арнаулы оқу орындары қатысты. Алаңда киіз үйлер тігіліп, тұсау кесу, бата беру секілді ұлттық салт-дәстүрлерден көріністер қойылды. Қолөнер көрмесі, ұлттық ойындар кезегімен өтіп жатты.
Шараға қатысқан облыс әкімінің бірінші орынбасары Арман Өтеғұлов Елбасының «Болашаққа бағдар: рухани жаңғыру» атты бағдарламасына сәйкес халқымыздың сан ғасырлық салт-дәстүрлерін насихаттау, ұлттық құндылықтарды орнықтыру, жас ұрпақты отаншылдық рухта тәрбиелеу мақсатында өңірде осындай жобалардың қолға алынып жатқандығын жеткізді. Мұндай игі шаралар алдағы уақытта да жалғасын табатын болады.
Қадыр Мырза Әли атындағы орталық алдында ақындар мен ғалымдар, зиялы қауым өкілдері жастармен кездесіп, өлеңдер оқылып, ұлттық тәрбие төңірегінде ой қозғалды.
Ұлттық салт-дәстүрді насихаттаған шара өңір өнерпаздары қойған концертке ұласты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).