ОРАЛ. ҚазАқпарат - Оралда сәбиін құрылыс нысанында тастап кеткен 21 жастағы әйелге қатысты үкім шығарылды, деп хабарлайды «ҚазАқпарат» тілшісі.
БҚО сотының баспасөз қызметінен түскен мәліметке қарағанда, Орал қалалық соты оны ҚР ҚК 119-бабы 1-бөлігіне (қауіпті жағдайда қалдыру) сәйкес айыпты деп таныды. Қылмыстық құқықбұзушылыққа барған әйелді 100 сағат қоғамдық жұмысқа тарту жөнінде жаза кесілді.
Қазіргі кезде сәби балалар үйінде тәрбиеленуде. Оның тағдыры қамқоршылық және қорғаншылық органының қорытындысына сәйкес шешілетін болады. Жасаған әрекетіне өкінген анасы шақалақты өзінің бауырына басқысы келетінін мәлімдеген еді.
Еске сала кетейік, 26 маусым күні кешкісін 4-шағынаудандағы № 24 орта мектеп ғимараты жанында салынып жатқан коттеджден дүниеге келгеніне шамамен екі аптадай болған сәби табылған еді. Кейін шақалақты 21 жастағы анасының тастап кеткені анықталған болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).